歐洲國家盃分組賽已近尾聲，最搶眼嘅隊伍就係荷蘭，在「死亡之組」Ｃ組將二○○六年世界盃冠亞軍意大利與法國殺到片甲不留，分別大勝三比○與四比一，益晒左丁山個荷包，於是自己笑到見牙唔見眼，成為荷蘭擁躉㖭，現在夠膽預測，荷蘭可以踢入決賽，與葡萄牙或克羅地亞爭冠軍，荷蘭奪標機會有六成以上。荷蘭隊今次恢復昔年全盛時期全能足球嘅八九成，進攻速度快，射門既狠且準，係十六隊之中最勁嘅；擁躉買定橙色球衣嚟慶祝可也。
荷蘭隊過往踢大賽，最怕射十二碼分勝負，成績之差，僅次於名氣大過實力好多嘅英格蘭。大概有見於此，教練雲巴斯頓下令盡數，盡量避免射十二碼。荷蘭最慘情嗰次，當然係二○○○年歐洲盃對着意大利（四強準決賽），全場射失兩個十二碼，贏唔到波，加時分唔到勝負，射十二碼決生死，荷蘭竟然射四中一，畀意大利淘汰，令阿姆斯特丹發生球迷騷亂，教練列卡特在球隊巴士上暗自哭泣。荷蘭足總痛定思痛，要所有青訓隊，少訓隊學射十二碼，甚至乎六歲兒童球隊踢完比賽後，不論賽果，一律要所有球員再射十二碼。不止此也，荷蘭搵埋體育心理學家輔導二十一歲以下青年軍射十二碼。原來在分生死之際，球員心理壓力大到不得了，那怕佢係施丹，還是亨利、Ｃ朗、碧咸、泰利。心理學家要求荷蘭青年隊注意（一）望實守龍門球員，如果唔敢望就係自己緊張，望實對手，就會令對方緊張，（二）唔好急射，用起碼2.8秒擺好個波（77%機率入波，用少於1.7秒嘅，入波機會只得58%），所以荷蘭球員要特登拉高對波襪，做完深呼吸先至去射。
荷蘭訓練咁科學化，成效如何呢？二○○七年六月，荷蘭青年軍與英格蘭青年軍大戰打和，要射十二碼分輸贏，雙方射到第十六次，卒之荷蘭贏咗，證明心理學家輔導起到作用。中國國足如果好似荷蘭咁樣好心機去受訓練，你估可唔可以衝出亞洲呢？六月十四日對伊拉克踢世界盃外圍賽，中國有主場之利，結果輸一比二，內地球迷應向飽受戰亂摧殘嘅伊拉克致敬！