中央為咗冷卻港人存人民幣嘅熱情，作為人民幣業務清算行嘅中銀香港，上個禮拜尾收到中國上海外滙交易中心通知，調高交易手續費，銀行打開門口做生意，成本加咗，當然要轉嫁畀消費者，銀行就將人民幣買賣差價擘闊。
據一位銀行界嘅朋友講，為咗唔好嚇走顧客，所以擘闊咗嘅差價只會側埋喺人民幣沽售牌價，至於買價會保持喺接近差價擴闊前嘅水平。

問題就嚟嘞，家陣咁多人做咗人民幣定存，到期時要將人民幣換番做港幣，隨時蝕滙價。就以上個禮拜二永隆銀行嘅人民幣買賣價計算，當日該行人民幣買賣差價60點子，如果以噚日嘅價計，就係100點子。
如果上個禮拜二去永隆銀行做10萬蚊港紙嘅人民幣定存，兌換成本大概536蚊，到噚日銀行人民幣買賣差價擴闊咗40點子之後，成本多咗357蚊。
當然你睇好人民幣升值，呢幾百蚊好濕碎，但呢啲都係投資成本，山長水遠滙錢返大陸人民幣戶口，做10萬蚊人民幣定存，3個月有3.33厘息，到期都係收得832.5蚊息，仲未計大陸存款利息稅、電滙成本，所以幾百蚊唔好睇輕。

其實，要兌換外幣又唔一定要喺銀行做埋嘅，喺買賣差價擴闊嘅前提之下，只要你一日唔兌換啲錢，一日都唔會蝕水，你大可以喺銀行攞人民幣出嚟後，要兌換嘅話就去找換店，由於佢哋人民幣「來貨」唔係全部嚟自清算行，好大部份係客人將人民幣換做港紙，只要人民幣「來貨」平，就可以有較為吸引嘅差價。
噚日光頭仔經過上環一帶嘅找換店，就發現好多找換店嘅人民幣買賣差價只係介乎30至75點子。當然你好大額咁兌換，一般找換店未必有咁多「貨」，但頂多分兩轉走囉。不過，敏妮要提醒一句，你可能要面對街頭俾人打劫嘅風險，自己小心啲啦！
網誌： http://wanmanli.com/blogs/