新轉投華納唱片嘅許廷鏗，噚晚喺九展舉行加盟後首個音樂會，全場爆滿兼獲好友鄭欣宜、關心妍夫婦、衛詩等現身支持。

許廷鏗全晚以90至00年代嘅廣東流行歌為主題，佢話全部都係中學時代陪伴佢成長嘅歌曲，當中包括有唔少電視劇同電影主題曲，着住校服演出嘅許廷鏗一口氣唱出羅家良、蘇永康、陳奕迅、鄭秀文同楊千嬅嘅作品。

許廷鏗話自己已經有一段時間冇做過音樂會，見到有咁多人嚟好開心，着住條黑色緊身褲嘅佢喺台走動時顯得步步為營，唯恐「爆呔」。另外，佢又應觀眾要求喺台上除衫，不過淨係除外套。許廷鏗騷後受訪時話唔好將焦點放落佢條褲度﹕「今晚係我喺新公司第一個音樂會，入場觀眾同反應係超出我同公司嘅預期。」咁係咪下一步就攻紅館？佢話：「希望啦，但今次都係學嘢為主。」

記者笑許廷鏗慳錢，全晚淨係着住兩款衫，佢解釋：「你哋有所不知，啲衫好貴㗎。」又稱自己向來惜肉如金，喺觀眾面前除外套已經好大尺度。