一單2017年關於為北韓洗錢嘅官司，招行（3968）、交通銀行（3328）同浦發銀行因為唔肯履行傳召令，咪理係咪身有屎，喺G20有美國傳媒爆出呢單嘢，用意好明顯，又係特朗普團隊喺習特會前自製談判籌碼，到時拎出越多籌碼自然有機會喺中國身上獲得更多回報。內銀唔履行傳召令就更明顯，擺明等習大大出手幫佢哋打大佬，呢個明顯唔係違唔違規問題，而係國家大事嘅中美政治問題。

招行係其中一間內地最以市場化方式經營嘅銀行。而之前幾年仲有民行（1988），但因為搞太多冇規範嘅理財產品，捲埋入謎網裡面，股價都出現內傷。招行能否引以為鑑，係長遠一個關鍵。

近期除咗聽到招行合作嘅私募基金9億人仔人間蒸發，仲有招行同錢端合作嘅爆出14億逾期事件，搞到有受害人集結維權。招行大跌，當然一方面係因為喺中美談判被擺上枱嘅風險，亦因為近期連環爆煲事件顯露內部監控問題，搞唔好長遠恐怕步民行後塵，靠股價對銀行小懲大戒，希望有用。而事實上，作為基金愛股嘅招行，股價可以跌咁多，亦反映港股整體面對走資問題，資金借勢沽貨減持，呢層貝萊德都食埋誠實豆沙包了。

最後要講講，始終都係增長概念可貴，李寧（2331）盈喜曾經爆升接近兩成，相比東岳（189）盈警要跌半成，證明增長股更值揸。參考頤海（1579）績後爆升Case，李寧現價計forward PE可能30倍左右，配合增長概念同品牌升呢，唔排除升到PE近40倍，再喺高位再企穩多一段時間，都仲得。

https://www.facebook.com/advanceguy1