Super Girls、蔡一傑、梁釗鋒及鄧小巧等，噚晚係灣仔伊館擔任慈善音樂會表演嘉賓，Super Girls成員着露腰小背心打歌服，少少性感，不過Cheronna話其實係佢哋最唔性感又最sport嘅一套。

五位成員當中，邊個身材最好?四個一致推舉Cheronna最可以性感，不過Cheronna就話自己只係某啲部位比拍檔們多咗啲肉，Aka笑話：「Cheronna好大方，畀我哋任掂都唔孤寒唔介意，真係一個係好女仔。試過同房佢唔着衫周圍走成個野人咁。」Cheronna解釋話：「我覺得喺屋企應該最舒服，最舒服嘅時候就係冇衣服束縛。」Aka笑話：「你咁講真係惹人暇想，不過初初我係屋企冇戴眼鏡，見佢冇着衫都只係見到一堆肉色嘅物體。」

Cheronna同夏雨個仔黃奕晨拍拖，Jessica乘機問Cheronna係咪喺男友屋企都唔着衫?Cheronna即刻否認：「梗係唔係，係都唔講你哋知，不過我哋成日有着衫，因為開咗冷氣，我怕凍。」Cheronna又話自己慣咗裸睡，Aka見機不可失即問：「咁佢(男友)係唔係?」Cheronna即刻鬧Aka：「你係咪害我呀?」跟住就扯開話題，無拿拿話：「我哋今日嚟係唱新歌。」

除咗Cheronna之外，四位姊妹講講下，開始失控，Cheronna無奈話：「佢哋最鍾意爆我啲野，因為我係最鍾意同佢哋分享嘅一個，不過唔知點解次次都喺做訪問時至爆我啲嘢！」Jessica又爆笑話：「怕唔怕俾老爺(夏雨)見到呢單新聞呀?」Cheronna不滿大叫：「你做咩叫佢做老爺呀?」Jessica再反駁：「你獨霸呀?唔準人叫老爺，你係西貢新抱囉！咩事咁孤寒啫！」

五位成員全程對答非常爆笑，不過又無損姊妹情嘅！

精選娛聞，喺晒《娛果》
http://fb.com/appledailyent