陳志忠切走7/8個胃保命 女友「賈名媛」陪養病待嫁

蘋果日報 2020/12/03 06:00

陳志忠胃癌類風濕關節炎邱芷微賈名媛
    在結婚誓詞中「無論順境或是逆境，富有或貧窮，健康或疾病，我將永遠愛你。」終生的承諾，現實有幾多人做得到？！無綫處境劇《愛．回家之開心速遞》的「賈名媛」邱芷微（Chelffy）最近可說禍不單行，除發現自己患上類風濕關節炎外，前TVB功夫新星男友陳志忠（Wilson）早前確診患上初期胃癌，要切除7/8個胃保命！
    這對苦命鴛鴦日前接受《蘋果》專訪，Chelffy感嘆：「我哋仲未結婚，已經要預先經歷呢啲事，嗰種感覺係更珍惜大家。」二人明年便踏入7年之癢，原本有計劃結婚生小朋友，但突如其來的惡疾，即打亂陣腳。Wilson說：「練開功夫同氣功嘅人，習慣聆聽自己身體，我發覺胃痛嘅次數變得頻密，以及有個奇怪嘅地方，食完嘢消化咗，約兩小時就開始胃痛，食少少又唔痛。」經醫生轉介照胃鏡，檢查後發現有幽門螺旋菌，他續說：「其實我爸爸都係胃癌，離世亦因為幽門螺旋菌導致，可以話係傳染，因為以前年代，一家人食飯唔會用公筷。」

    陳志忠父母均患癌離世

    原來Wilson的父母都不幸因癌病離世，爸爸是胃癌，媽媽是肺癌，他直言要照顧一個病人不容易。因為他的腫瘤在偏中間位置，要做微創手術切掉大半個胃，現在維持一日食六餐，令胃部適應。「有人會話，你唔煙唔酒都有病，做唔做運動都得啦。但我覺得都要練，因為當你身體出現問題時，承受嘅能力會比一般人強，身心都好啲。個手術話就話微創，開6個窿，肚臍最大要縫6針，表面冇乜嘢，但裏面工程一樣咁大，切咗個胃仲要重建消化系統，有好多釘，又要將盲腸移位。但我手術後，冇發過燒，醫生都讚我份驗血報告好似冇做過手術一樣。」
    手術後個多月，Wilson外表「硬淨」，完全看不出是一個病人，訪問期間幫手搬凳，爬高兼打木人樁。他直言擔心手停口停，手術後仍有教授小朋友功夫，而女友Chelffy則教唱歌、演戲兼小朋友入學面試技巧，Wilson說：「呢間教室我投資咗近7位數，清潔、入數、宣傳、導師都係我哋，好少請人。老實講，呢一年唔易過，暫時都係入不敷支。一開始面對社會運動，大年初一又話疫症，估唔到個農曆新年好長，去到暑假呀！到前幾個月好啲，又發現呢個病...唉，但我都係樂觀嘅，現在仲有教，我諗我頂得住，只係遲啲要做化療就要搵人彌補我嘅空缺，相信之後收入可以上返去，我係正面嘅！」早前有另一位醫生，診斷他由第一期，變未期胃癌，令他心情好似坐過山車一樣，再三檢查後維持第一期，他亦有為自己定下目標：「好有信心（康復），無論如何都要打敗病魔，我現在過咗頭幾關，下一關就係5年唔可以畀佢復發，之後目標就係10年唔復發。」

    邱芷微被勸分手

    33歲歌手出身的Chelffy，從沒有想過一個生活健康的人會突然生Cancer，但既然已發生仍要一齊面對，陪伴出入醫院，又隔日煲魚湯讓男友傷口快些復元，照顧無微不至。她直言曾有朋友勸喻分手：「少數啦，始終同佢一齊咁多年，唔通因為一個病就分手咩？！」對抗病魔不止需要毅力，身邊人互相扶持都很重要，因為健康上Chelffy同樣遇到挫折，今年5月發現類風濕關節炎，食指和中指關節明顯腫脹，「好多朋友話我咁後生唔會，好小事，仲叫我飲酒，但其實手尾好長。」原來陳志忠媽媽生前亦患過同一個病，知道病情如果嚴重，關節會扭曲及變形，甚至心臟衰竭和引發肺炎，增加患癌風險。
    慶幸Chelffy病情仍屬初期，醫生不建議食西藥，而是看中醫調理，至於Wilson早前已經雪藏精子，為未來結婚生育做準備。可擔心遺傳到下一代？Wilson坦言有諮詢醫生意見，他說：「從醫生角度，人人都有機會患癌，胃癌同肺癌亦非遺傳病，佢哋話唔關事。」Chelffy則說：「初初有（擔心）嘅，話冇就假，但樂觀，我好有信心我哋會冇事，所以先想講多啲資訊畀大家聽。」
    採訪：嵐山
    攝、錄：陳慧安、葉君海
    場地提供：星元素演藝學院
    empty
    陳志忠不幸患上胃癌，幸得女友Chelffy細心照顧，隔日便煲魚湯，希望傷口快些復元。（蘋果日報）
    empty
    陳志忠個多月前做手術，但復元能力強，幾乎沒有停過教授小朋友功夫。（蘋果日報）
    empty
    Wilson要在肚皮開6個窿做微創手術，要切掉 7/8個胃。（Facebook圖片）
    empty
    邱芷微年中亦發現患上類風濕關節炎。（蘋果日報）
    empty
    邱芷微雙手食指和中指關節明顯腫脹。（蘋果日報）
    empty
    Wilson投資近7位數在上環開教室，與女友Chelffy事事都親力親為，連清潔姐姐都做埋。（IG圖片）
    empty
    二人有共識待康復後，便會結婚兼生小朋友，對未來樂觀，充滿正能量。（蘋果日報）
    empty
    Wilson笑言自幼喜歡打架，中三便正式跟師傅學武術。（受訪者提供）
    empty
    Wilson在2011年參加無綫節目《功夫新星》入行。（資料圖片）
    empty
    陳志忠習武超過30年。（Facebook圖片）
    empty
    Wilson早前參加港台《功夫傳》，尋找武術宗師。（Facebook圖片）
    empty
    Wilson離開無綫後，仍有參演舞台劇。（Facebook圖片）
    empty
    邱芷微原名邱美薇，有「tempo妹」之稱，做過模特兒和歌手。（IG圖片）
    empty
    Chelffy開心遇到「賈名媛」這個角色，令她名利雙收，在外面接多了表演工作。（無綫電視截圖）
    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！