港股正式突破25000大關，好波！銀娛（027）業績普通，但股價早已反映轉弱因素，放榜後反高潮炒起，連帶金沙（1928）亦升埋一份，成為恒指破位關鍵。大市創逾六年新高，從好嘅角度出發即係金融海嘯後嘅蟹貨已完全消化，尋頂之旅可來得更輕鬆，一旦大戶散戶反手追貨，升勢肯定更狠更急，堅決維持今次升浪睇28000目標不變！

息率逾五厘夠吸引

泛亞環保（556）不負眾望，兩日累升三成，可斬邊留邊等業績。億和（838）終於發力，突破短線下降阻力，52周高位1.92元相信只係中途站。憧憬染藍嘅領匯（823），連爆兩棍創新高，兼有成交配合，基金搶貨手影明顯。如果嫌領匯升得太多，不妨考慮另一隻房託基金置富（778），雖然現階段難言晉身成份股，但估值卻平領匯一大截，追落後要揀佢。
置富現時持有17個商場及2,606個車位，最新市值136億銀，規模雖不及千億元王國領匯，但現價市賬率僅0.7倍，較領匯嘅1.1倍平近四成，息率5.3厘，亦高領匯近兩個百分點。置富營運策略與領匯大同小異，同樣透過收購及翻新商場提升租值，說穿了又係食正樓市狂潮。噚日一棍回補月初嘅下跌裂口，新升浪一觸即發，用8蚊做目標，已有一成回報，屆時息率仲有近五厘！
廣告一則︰大市開行turbo，戰友可多上唐牛fb專頁交流冧巴，集思廣益，專頁亦會提供即市攻略，務求快人一步理想達到。

唐牛
https://www.facebook.com/tongcow88