黃淑儀（GiGi姐）服務無綫50年，今年1月約滿離巢後，原來已過檔ViuTV。早前GiGi姐偕ERROR成員梁業（肥仔）同吳保錡，到台灣拍全新烹飪綜藝節目，不過台灣花蓮日前發生6.1級地震，前日凌晨宜蘭近海再發生3.2級地震，目前眾人正喺宜蘭拍嘢，噚日更兵分兩路，肥仔同保錡到宜蘭海邊拍攝時再遇輕微餘震。ViuTV公關部回覆指唔會因地震取消外景，但絕對會喺安全情況下工作，攝製隊目前正離開宜蘭到台南取景。

「我啲細路喺台北」

記者噚日聯絡GiGi姐、肥仔及保錡，三人拍一段短片回應。保錡問有否遇過地震？肥仔話：「啱啱咪地震囉，頭先搖嚟搖去好似喺架船度，搖到好犀利咪就係囉。」GiGi姐話：「你哋都感覺到有地震呀？因為我哋睇到新聞話宜蘭呢邊又有、花蓮又有、台北又有，所以我都好驚，因為我啲細路喺台北度假，你哋又去咗海邊，我幾驚呀！」

GiGi姐續稱：「會唔會影響到你哋呢？我真係好擔心，但因為我哋呢邊坐喺車行緊公路，所以冇咁大嘅感覺。」佢又問二人當時情況，肥仔話：「當時震咗3、4秒，唔係震好耐，所以嗰一刻我哋唔知地震，震完之後導演話『啱啱地震呀！』先知。」
撰文：馮仁昭