當年今日

701收料站:博軟放風有得炒

蘋果日報 2002/02/27 00:00


今日又有隻創業板新股博軟控股(8096)上市。靚女經紀話,由於又係全配售,兼且聽講有多名大哥拍心口話得,所以隻股有短炒價值喎。
博軟今次發行1.25億股,招股價每股40仙,集資總額只有5000萬元,真係size細細容易炒。
老實講,過年前已經有朋友同小初提過呢間公司,小初第一個印象就係覺得間公司個名古怪,收尾聽聞話間公司從事「瘦客戶機」解決方案嘅軟件,就更加一頭霧水,但靚女叫到,點都要應酬吓,所以要咗些少。

短炒見好要收
雖然聽聞今次有間華資證券行出力照起,但睇番公司背景,原來同億勝生物科技(8151)同一系統,億勝股價由去年6月首日掛牌1.20元高位,到近期約40仙水平,表現認真麻麻,睇怕小初都係見好即收,賺幾格就走人算啦!