廣東經典金曲多年嚟都有追隨者，蘇珊同曾航生今日就去到新城，為下月2號假屯門大會堂舉行演唱會做宣傳。

蘇珊指雖然場地離市區較遠，但交通方便，兼且該區有唔少人熱愛音樂。曾航生就大讚場地音響好好，而屯門大會堂演出文化，一向都主力好音樂，佢哋都異口同聲表示，今次演出係為廣東經典歌作保育工作。

佢o地覺得廣東經典歌係百聽不嫌，曾航生話「以往廣東歌o既旋律同歌詞係有種化學作用，內容又直接易明。」蘇珊就補充指現今廣東歌著種係技巧，有時將歌詞的唱法扭得太多，往往好易變成第二種歌詞意思。佢o地經已埋首排練，問到會唱咩好歌？蘇珊話「要賣關子，大家o黎睇咪知。」曾航生透露會邀請蔡立兒擔任嘉賓，原來當年首經典合唱歌《再見亦是朋友》，本來係佢同蔡立兒唱，後來因為公司政策而轉人，所以今次都想o係台上唱番一次。