韓國男團Super Junior(SJ)於今年11月6號踏入出道12年，除咗仍然當緊兵嘅厲旭及圭賢，東海、銀赫、始源早前亦相繼退伍，東海及銀赫上月更孖同門嘅SHINee、EXO等人襲港開SMTOWN家族騷。

早前一直有指SJ將於今年下半年回歸，不過強仁及晟敏先後因涉酒駕、遭粉絲抵制，所以今次新碟只得利特、希澈、神童、藝聲、始源、銀赫、東海等七名成員參與。而今日有報道指SJ嘅新碟將於11月6號出道當日發行，以紀念出道12周年，今次亦係SJ繼《Devil》後事隔兩年再出碟，令粉絲相當期待。

報道仲指SJ除咗出碟之外，更為年尾舉行嘅演唱會籌備中。不過及後SJ Lable否認報道，指SJ的確為回歸新碟做緊準備，但確實回歸日期尚未落實。