特首梁振英一再反口，任意深圳擴大自由行，引發新一輪中港矛盾，搞到旅發局主席田少都睇唔過眼，要喝停有關計劃。旅發局老友噚日同八方講，啲旅客嚟香港，其實唔係一定Shopping，仲有好多嘢玩，佢哋啱啱搞咗個香港一天遊嘅行程設計比賽，其中有兩隊分別嚟自泰國同大陸嘅旅客，設計咗一趟「失戀療傷之旅」，拜開四面佛嘅泰仔去北帝廟拜神，內地雙妹嘜就走去搭叮叮，結果雙雙贏咗冠軍，各自捧走20萬獎金。
今次共有9隊參賽，包括南韓、新加坡等，泰仔Poomjai Tangsanga帶住泰妹Achaporn Chirakitcharern「療情傷」，第一站去北帝廟拜神，真係估佢唔到。之後行吓灣仔街巿，去鴻星食飯，仲膽粗粗走咗去半島酒店搭直升機㖭。搭完直升機都未夠，最後仲去咗深水灣遊船河。泰仔沾沾自喜話，艇主原本收佢6,000蚊，佢還價講到1,000蚊。殺價殺得咁高興，泰仔開心到極，話今次係第一次去半島坐直升機，有咁嘅體驗，乜嘢情傷都冇晒啦。