「網絡23條」之前正式收檔，今屆立法會會期都唔會再傾，早排為咗草案日日落立法會聽點人數鐘聲嘅蘇錦樑前功盡廢，今晚佢出席新聞行政人員協會30周年晚宴，就大騷音樂才華，帶埋ukulele嚟自彈自唱，仲作埋歌詞，唱盡審議「網絡23條」嘅心聲，歌詞啜核又好笑，好似「其實版權條例係要過，面對網民反對太坎坷，增加豁免六大項喎，佢話未夠睬你都傻」，「條例唔獲通過，至傷心就前功盡棄咗」，仲乘機冧老婆，「返屋企蘇太會呵番我」。

講到「網絡23條」，點會唔提點人數拉布，鐘聲響不停嘅情景，蘇錦樑嘅歌詞梗係有提到啦，「坐坐坐，成日齋坐，個鐘響未停過，點算人數，終於習慣咗」，仲唱埋「叮噹，叮噹」，成個情景出晒嚟呀。

特首梁振英都係席上賓客，蘇錦樑咁精彩嘅表演當然吸引住佢視線啦，仲似乎睇到掩住個咀偷笑添，唔知佢係笑蘇局長嘅歌喉，定係諗起「網絡23條」被拉倒覺得開心呢？