今個夏天香港好熱鬧，唔少球星臨香江，球迷爭住去迎接，好似朗拿度、保羅普巴、熱刺全隊同埋尋日到埗嘅NBA球星尼拉特，但有位仁兄原來都嚟咗香港，就冇乜人留意，講嘅係現時效力緊中超天津權健嘅柏圖。

柏圖喺微博上載咗同本港的士司機嘅合照，話原來佢喺上周六踢完對遼寧開新場中超後有兩日假，於是就自製個短trip過嚟香港玩，諗住低調啲，點知畀一位著上AC米蘭波衫嘅的士司機認到，而呢位A米球迷仲同佢玩自拍。佢話其實每次都會答應同粉絲合照或幫佢哋簽名，因為知道自己呢個好小嘅舉動，可以為粉絲帶來無限快樂。不過，球迷想尋「鴨仔」蹤影，就唔使指意喇，皆因佢已經返番上去。

另外，鴨仔仲話香港天氣唔錯，但就有啲熱；如果同天津相比，香港就真係有啲濕熱，但如果講空氣污染指數，可能嗰邊比較難呼吸。