報紙話九肚山有新豪宅樓盤樓花出售，搞到一啲老友頭昏眼花。賓架C係總經理級，住在駿景園大單位，放工之後未返到屋企，將架車轉個彎，就上咗九肚山，想話裝吓個新樓盤喺邊度，當然搵唔到啦，因為個新盤其實係位於火炭半山吖嘛。
賓架C話買豪宅一定要親身去現場睇清楚，避免誤導。佢嘅老闆曾經去半山區一座超豪大廈實地參觀，發覺要入咗停車場，行咗一輪，先至可以行到大廈正門入口，當堂唔高興，講咗一句：「將來點樣招待客人呀？真正豪宅，大門要四正，住客人客可以喺門口落車先至得！」賓架C老闆係真真正正豪門大戶，買豪宅要講卡士。呢類新款豪宅，留番畀啲新發財買來炒就啱嘞。

呢座所謂九肚山樓盤，實在位於火炭工業區後面山崗上，山崗下面係九巴停車場，夜晚幾十架巴士回廠，清晨巴士出廠，唔知會唔會有噪音呢？據L教授講，睇地盤圖片，洋房就最接近九巴停車場，望出去就係火炭啲工業大廈；另一批洋房望出去係樂林路一帶住宅，望馬場及城門河就俾火炭銀禧花園及駿景園擋住。講景觀喎，駿景園攞晒啦。
L教授話：「如果以前我話畀人聽住響九肚山樂葵徑，分分鐘俾人懷疑我錢從何來。帶仔女去九肚山遊車河，我就試得多，現在叫佢哋去完九肚山再返番火炭睇樓盤，實在係一課通識教育，教識佢哋何謂推銷包裝，以及消費者自救之道，唔可以下下以耳代目，畀錢人哋之前，自己要親身睇真啲！」