【本報訊】大阪機場前排因為打風搞到大水浸，航班升降依家仲係慢慢恢復中，話口未完，又輪到東京成田機場出問題，旅客排長龍之餘，地勤人員仲要手寫登機證。

話說劉先生一家三口去咗東京玩幾日，18號(周二)晚返香港，一心諗住避開咗超強颱風「山竹」，一定冇事喇啩！點知去到成田機場，見到櫃台排晒長龍，先知電腦系統出現故障，由於打印唔到，地勤人員用最原始方法，手寫登機證畀乘客。

由劉生提供嘅相片見到，有乘客坐咗地上，不過秩序都算良好嘅！至於張香港快運嘅手寫登機牌呢，顯示劉先生係乘搭UO849航班返香港，咦！字體都幾整齊喎！劉先生話，咁原始嘅登機牌都係第一次見。

除咗電腦系統故障，劉先生嘅航班仲要delay，原定3點幾起飛，7點就到港，結果等咗差不多3個鐘先飛到，睇黎劉氏一家今次嘅旅行都好難忘！

你敢爆，我敢獎！ 立即WhatsApp《蘋果》24小時爆相爆片熱線 或致電：63836568