既是練馬師新人王，亦係五班王，羅富全外號多多，只因成績理想，贏馬贏到唔識停。

今午（23日）沙田日賽，是2017年最後一次跑馬，結果羅富全又有馬贏，佢於第四場泥地五班一哩，以大熱門「鑽之友」，在騎師田泰安胯下建功，單Win及組合獨贏A1分別派42.5及26元。

羅富全又增添一場五班頭馬，並將從練首季推高至29Win，繼續高踞榜首，暫領先師傅排第二的蔡約翰增至三Win。

「鑽之友」對上兩場均由雷神操刀並勝出，今次因雷神停賽換上田泰安，沿途居後列，原本末段一直處於下風，惟臨尾在田泰安力策之下，呢匹六歲馬克服133頂磅壓力，以勁勢撲上，及時追過最先透出的潘頓座騎「滿載而來」掄元，險勝短馬頭位。

「鑽之友」今季由吳定強轉投羅富全，連同今仗在羅廐三戰全勝，俱是五班泥地一哩，成為羅富全從練首匹三出三捷馬，堪稱羅富全代表作之一。

第四場前四名有熱有冷，當中「滿載而來」、「漸信名駒」及「勁伶利」順序跑獲亞至殿軍，四重彩派九萬蚊鬆啲。