回復自由身嘅胡杏兒，噚日去咗廣州出席活動，近排有傳佢將於年底喺英國同男友李乘德（Phil）結婚，杏兒笑笑口話：「恭喜我乜嘢呀？冇呀，未呀，總之所有嘢唔係自己公佈，唔可以當真，𠵱家好多傳聞，有啲人話我去英國結婚，連我自己都唔知。」
前排有報道話杏兒將會豪貼200萬包辦童話式婚禮，杏兒話呢個都唔係事實，童話式婚禮亦都唔係佢想要嘅嘢，所以唔會講太多。不過問到佢如果將來結婚會唔會幫手畀啲錢？杏兒笑話：「呢啲我唔理喇，我梗係蹺埋雙手，如果有人娶我梗係人哋畀喇，呢啲係誠意。」講到理想嘅求婚儀式，杏兒話：「未發生喎，我唔知呀，我覺得誠意最緊要。」

佩服林夏薇閃婚

跟住又問杏兒會唔會好似林夏薇閃婚？佢笑住話：「我好佩服佢，好犀利，真係可以呃到你哋（傳媒），但係我覺得每個人有唔同嘅選擇，如果係嘅話，我自己覺得唔使咁秘密，你哋都會戥我開心嘛！」
日前杏兒喺Instagram大晒廚藝，為爹哋媽咪親自下廚，睇嚟佢係為做人妻做準備，杏兒話：「呢啲年齡去練吓都差唔多，都要學吓呢啲嘢，如果唔係生活會好乏味同枯燥，唔可以淨係得工作。」
撰文：馮仁昭