美國女星安琪蓮娜祖莉（Angelina Jolie）日前帶埋仔女去納米比亞，探訪以佢個女「Shiloh」命名開設嘅野生動物保護區Shiloh Wildlife Sanctuary。11年前，佢同畢彼特（Brad Pitt）於納米比亞迎接第一個親生女Shiloh出世，為咗紀念呢一切，佢特意創辦呢個野生動物保護區，消息人士透露：「Shiloh第一次見到保護區嗰時雙眼發光。」

美國《People》雜誌報導，Shiloh野生動物保護區專門照顧遭到偷獵同虐待嘅大象同犀牛，事前Shiloh唔知道媽媽用佢個名命名，「呢個名對佢嚟講係一個驚喜，佢非常開心，見到呢啲剛被救援嘅大象安頓時，佢同兄弟姊妹靜靜地喺四周觀察」。42歲嘅安琪蓮娜帶住6個仔女於當地留咗5日，幾個小朋友一齊學點照顧野生動物。另外，安琪蓮娜就同納米比亞總統伉儷會面，討論當地嘅野生動物保育問題，安琪蓮娜話：「可以同N/a'an ku sê野生動物保育中心合作，係我嘅榮幸。」