鄧麗欣（Stephy）今日喺銅鑼灣出席「漂書大行動2016」啟動禮，對於早前有傳舊愛方力申（小方）先對ViuTV選美真人騷佳麗張沛樂(沙律)嗒糖，跟住又有指小方同何超蓮去尼泊爾做義工時表現親暱，及後再有報道指小方約會一名貌似大劉女友甘比嘅熱褲女，Stephy一臉愕然，佢話：「係咩？我冇乜點睇，你哋自己問佢。」

講到小方同佢分手後，就先後有3段緋聞，覺唔覺得佢花心？Stephy話：「應該有唔係真嘅。」不過到底大家曾經愛過，所以當大家追問Stephy覺唔得小方方花心，Stephy言談間都好維護佢咁話：「死喇，一落車就要答呢啲問題，我唔識答...冇啦梗係，佢啲新聞冇乜點睇，當然我信佢嘅為人。」小方專一？佢話：「如果唔係都唔會同我咁耐。認識佢嘅人都知佢性格如何，佢係比較專一嘅人，唔係話變就即刻變到，你哋訪問番佢啦！」

Stephy表示現時冇新戀情，佢話：「我圈子比較細，要識都識晒。」台灣「小牛」呢？佢話：「朋友囉，大家有聯絡，喺排球上有交流。」問佢覺唔覺得小方同超蓮襯？Stephy話：「靚仔靚女一定襯。」同佢自己呢？Stephy話：「襯唔襯唔係主要重點，最重要係兩個人夾，襯呢啲嘢好表面，佢同我都襯架！」

唔知佢哋又會唔會翻撻即結婚？佢話：「我哋只係講o依家，將來冇人知，我哋暫時冇聯絡。」Stephy表示因為冇適合時機，所以冇人行出第一步跟對方聯絡，佢話：「唔係刻意唔搵，開頭係想冷靜下先。」真係冇彎轉？佢話：「我當然想做番朋友，因為冇聯絡，過啲時間啦，心底都係想做番朋友，等大家丟淡少少先聯絡。」

至於擇偶條件係咪要小方呢類型？Stephy話人越大越覺得好多嘢係冇規限，係睇兩個人夾唔夾。如果同同性拍拖又會唔會考慮？佢話：「冇諗過，我身邊有呢種朋友，我都接受呢件事，o依家社會對男女都好公平，但暫時未接觸，好難答你哋。」