120位市民向TECA投訴鄭大班責罵高永文之事，竟然燒到左丁山頭上。有讀者來電郵（附上佢其他朋友嘅電郵），劈頭就話：「左先生你面子大，請支持鄭大班，香港需要佢嘅節目！」嘩，只有鄭大班面子大可以救左丁山嘅啫，邊會話左丁山面子大呀！其實即使有好多人投訴佢嘅節目，大班仍然談笑自若，上星期三入馬場贏到笑，上星期六佢又喺沙圈出現，陪住馬會主席夏佳理與蔡約翰傾偈，佢出現之後，隻「駿河」繼續落飛，左丁山亦跟風，卒之輸到攤攤腰。
亦有讀者來電郵大罵鄭大班對高永文唔夠公道，商台應該對佢有啲監管！可以講，鍾意鄭大班之人，非常鍾意；憎佢之人，亦非常之憎，似乎冇乜中間派。一位讀者傳真嚟以下幾句，叫左丁山「細味斯言」！猜猜謎：

「有我講，冇你講；有糠港，冇香港。」
「港中戾氣千多種，城裏刁民一大班。」
左丁山睇完，笑到好大聲，秘書小姐以為我神經失常㖭。於是畀佢睇，問佢明唔明，佢話：「唓，即係話香港充滿戾氣，又有一大班刁民，咁多刁民，啲高官都好難應付啫。」左丁山聽完，又繼續笑。
好一句「城裏刁民一大班」，可以媲美梁錦松上任財政司司長之初，佢在壽臣山官邸掛上一幅港大同學送畀佢嘅題字「戇居」，𠵱家我哋知道阿松買車係戇居啦！左丁山如果好似鄭大班咁樣贏馬，就請一位書法家寫一幅「城裏刁民一大班」送畀佢！