【教育由媽咪負責】努力造人望湊成「好」字 黎諾懿:俾個生女嘅信念我
小春雞Playgroup黎諾懿
因為有咗囝囝「小春雞」嘅關係,黎諾懿多咗接同小朋友有關嘅工作,日前佢為BB爬行比賽擔任評判,睇吓就諗起小春雞學爬嘅時候,佢話:「作為父母,要好好珍惜呢段時間,因為實在太短暫,小春雞7個月大開始識爬,到咗11個月學行,嗰陣佢由爬到行,只係用咗5日,仲要唔使扶任何嘢就可以行,比同年小朋友行得快。」
唔知係咪呢個原因,黎諾懿話自己盡量爭取時間陪阿仔,o依家好期待佢講嘢:「小春雞一向都有好多訴求,如果可以快啲識得用說話去表達訴求,唔好成日齋叫,我已經好安慰。」但係原來小春雞喺三個月大時已懂得叫爸爸:「佢第一句叫爸爸,第二句講街街,第三句講狗狗,最後一句先識叫媽媽,所以我老婆好妒忌。」
黎諾懿o依家安排咗小春雞返playgroup,不過學業嘅嘢全權交俾太太:「我老婆有修養、有文化,所以個仔嘅學業,所有都交畀老婆處理,我只係負責畀錢。」之前黎諾懿為嬰兒食品拍廣告,見到現場有唔少小妹妹,搞到佢忍唔住話:「大家都知我好鍾意生囡,希望今次接觸多啲妹妹,下年可以生番個豬女,其實o依家已經努力進行中,一定要係豬女,希望大家可以俾個生女嘅信念我!」
精選娛聞,喺晒《娛果》
http://fb.com/appledailyent