何志平學燒槍險惹一身蟻 - 李八方

蘋果日報 2003/03/14 00:00


中東戰雲密布,揸慣手術刀嘅民政事務局局長何志平,唔知係咪受到可能開戰嘅氣氛感染,前兩日學人燒槍,點知差啲惹麻煩。家陣時勢,槍枝彈藥嘅嘢特別惹火,局長都係少碰為妙。
話說星期二何志平到觀塘巡區,參觀一間私人槍會時,順手試下實彈射擊,佢分別用左輪手槍同有瞄準器嘅比賽用手槍,燒咗十幾發子彈,非常過癮,重話所有男仔都夢想過玩槍,佢亦唔例外,呢次總算償咗兒時心願。

遭投訴非法燒槍
點知有位持牌槍械教練睇完上述新聞,打電話向《蘋果》投訴何局長非法燒槍,話法律規定所有人真槍實彈射擊前,都要上堂接受訓練。
八方第一時間向何志平同警察公共關係科查證,何局長嘅新聞秘書大為緊張,猛話會查清楚,又話何局長當日唔知嗰支係咪真槍,亦可能唔知有條咁嘅法例。
有阿松嘅前車可鑑,警方效率奇高,一日就回覆,話法例的確有咁嘅規定,不過投訴嘅市民漏咗一條,法例同時註明,如果現場有合資格槍械教練監督,就唔算違法,何局長嘅新聞秘書亦查過當日槍會有教練在場。
何志平終可放下心頭大石,八方就覺得佢執番身彩,如果佢開槍時教練突然肚痛行開咗,局長分分鐘周身蟻。



傳真︰2623-9278
電郵︰[email protected]