【新增動新聞】
雖然周二祖雲達斯對摩納哥嘅歐聯4強次回合早早喺比數上分出勝負，但戰至尾段仲有唔少火藥味，其中摩納哥守將基歷克喺72分鐘有意無意間跳起踩落希古恩嘅大髀，令後者一度神情痛苦喺地下「典床典蓆」兼痛到喊出嚟，但球證並冇吹罰、摩納哥亦冇意欲將個波踢出界下，要由祖記隊友文迪蘇傑爭頂時疑似向法賓奴泰華利斯「開踭」先至吹停賽事，文迪蘇傑完場前仲係咁對住基歷克嚟鬧，結果食咗面黃牌，好彩最後冇釀成任何不愉快事件。

世上沒有無緣無故的恨，有網民就破解到基歷克因乜同祖記咁大仇口，原來呢位波蘭守將之前係效力祖記嘅都靈同市宿敵拖連奴，直至去年夏天先轉投摩納哥，連歐聯4強抽籤得知對祖雲達斯後，都要喺社交網站post咗張當年效力拖連奴時鏟截對手嘅相片振奮士氣，可惜最後都要出局，惟有專注力爭法甲錦標啦：「一場美麗冒險告終了，歐聯處子球季已經唔錯。我入到第一個歐聯入球，又同球隊殺入4強，無嘢需要慚愧，目前要專注爭法甲。」