阿姐汪明荃今日喺土瓜灣綵排演唱會，噚晚無綫嘅頒獎禮已經曲終人散，雖然有啲網民唔係幾滿意賽果，仲話要發起重選，但係阿姐就話：「由佢喇，冇乜所謂，實有人鍾意，有人唔鍾意，我反而覺得呢個係一個好新嘅嘗試，睇劇嗰陣已經諗緊將來會投邊個演員，拉近演員同觀眾嘅距離。」

講到視后楊怡喺台上公開多謝阿姐，話:「我要多謝Lisa姐(汪明荃)，係你話畀我聽，經理人合約一定要簽，佢會畀好多機會你!」完全講出封視后潛規則。

楊怡玩踢爆，問阿姐點睇？阿姐嘅答案有啲離奇：「阿怡係一個好識得多謝人嘅人，以前同佢合作拍《昏前婚後》，佢嘅演出已經好好，好有演戲天份。」

至於林峯大熱倒灶，阿姐就答得清晰啲，話﹕「阿峯仲後生，仲有大把機會，每個人都要遵守遊戲規則，可以咪參加，無所謂。」

至於有傳話「萬千光輝演藝人大獎」嘅人選唔止一個，阿姐話：「我唔清楚，從來都係得一個獎。」