呢個星期六晚（31日），有杜拜世界盃七場越洋直播兼香港馬會受注，可惜今次冇港隊馬參戰。

前事不忘，唔好講到「靚蝦王」喺2001年當時仲叫杜拜免稅店盃嘅杜拜草地大賽中，僅負「雞尾酒」咁遠。過去十年八載，香港隊一再有馬於杜拜世界盃日交出好成績，好似金寶隻「崇山寶」，2014年3月底就揚威當地嘅阿喬斯短途錦標。

事隔四年，今晚（28日）快活谷夜賽，「崇山寶」同主嘅「飛雲寶」應戰谷草頭場；另外「靚蝦王」馬主劉錫康公子劉日申，亦有隻「哈蝦巴爸」出擊第6場，可想而知時間過得幾快。

「蝦佬」劉錫康至今仍係凱旋門常客，但洪金寶自阿喬斯短途錦標，至今四年未嘗勝果，雖然今年洪金寶冇馬遠征杜拜，但若「飛雲寶」呢次能在香港贏馬，相信佢亦收貨，事實「飛雲寶」跑番唯一上名之谷草一哩，確是開齋大好時機。