當年今日
關於我們

飛短留長:MK髮界10件事 髮型師勁似江湖大佬

蘋果日報 2006/05/27 00:00


《飛短留長父子兵》收視竟然暫勝《火舞黃沙》,證明小本經營一樣可以砌低大Cast名牌,現實髮型界又何嘗唔係?去旺角飛髮剪襯都係MK頭?如果你有以上想法,唔好意思,你已經Out咗!旺角有大把臥虎藏龍或大打溫情牌嘅資深髮型師、開闢二樓天地Gimmic多多嘅樓上舖,最後當然唔少得劈價收費流水作業式嘅「劈場」,簡單一句──你想要整乜嘢頭,旺角總有間畀到你,而幫你整頭嘅,型格仲似足江湖大佬,分分鐘比你更MK。

記者:羅灝汶
攝影:譚盈杰
模特兒:Kelvin、Yani(Salvador)
何謂劈場?
劈場用超低價吸引客人,洗吹每次收費大概$40-$50,行內人透露:「劈場可以劈價,因為髮型師人工平,我見過某髮型屋老闆用Headphone臨場細細聲教旗下員工剪髮,呢啲所謂髮型師學一星期剪髮就正式落場,完全對客人無保障。」原來係咁,唔怪得咁多MK場劈得起喇。
empty
■10分鐘,David10分鐘就起正宗MK頭!行轉旺角喇,個個男仔都係咁剪㗎。
empty
■又係10分鐘,David只用10分鐘就Set出一個晚宴頭,模特兒都大讚滿意。
一)大佬10分鐘幫你Set頭
唔知點解,MK髮型師本身都有個入型入格嘅MKLook!D-Atelier喺龍蛇混雜嘅砵蘭街開檔7日,主理人係硬朗肥師傅David,遠睇黑社會味極重確有幾分旺角大佬Feel,傾落先發覺佢非常友善,兼喺香港髮型界有舉足輕重嘅地位,就連職訓局、教統局都搵佢做顧問:「我做呢行幾十年,下星期會飛去上海擔任一個大型理髮展覽舞台監督,下個月喺香港舉行嘅第30屆亞洲髮型化妝大賽我都係舞台監督,有專業認可資格嘅髮型師,先可以減少業界害群之馬。」佢嘅絕技係10分鐘Set頭,MKLook、高貴Look,你噏得出佢都做得到。
D-Atelier(23887898)旺角砵蘭街113號B舖
empty
■有委任狀為證,David做過2004年香港青年髮型比賽評判。
empty
■Strawberry係第二把交椅,大紅髮色離遠都見到,都好有江湖味。
二)$8,000把鉸剪照用
咪以為旺角多劈場就無間好嘢,HairDynamic裝修夠Grand絕非一般地踎舖,印喺店外宣傳海報報上面嗰位髮型師叫Tim,相貌同徐克有9成似,一身黑衫都好有大佬Feel,而事實佢的確係大佬,不過係理髮界大佬:「啱啱搬店,主要客源係舊客,𠵱家慢慢吸納緊新客,我間舖其他髮型師都由我一手帶大,大家共事多年,啱啱就有位徒弟仔攞咗髮型大賽冠軍。」論裝修,HairDynamic喺旺角區算一級水準,連用嘅鉸剪都好豪:「全部係一級理髮店專業用嘅日本『光』牌鉸剪,每把起碼$8,000,所以黃毓民、張天愛等名人都幫襯過我。」
empty
HairDynamic(23320819)旺角洗衣街187號地下
empty
■一系列「光」牌專業用鉸剪,把把差唔多成萬蚊。
empty
■Tim得意門生Sam,啱啱攞到理髮比賽大獎。
empty
■Tim外形似江湖大佬,做人亦相當有義氣,每日為兩位街坊長者義剪。
empty
■就係呢張海報嘞,Tim幾似徐克?
三)二樓舖必有落地玻璃
因為租平、地方寬敞,所以旺角衍生好多二樓理髮店,客路主打年輕人,落地大玻璃幾乎係呢類二樓舖嘅指定Icon。有幾分似阿Rain的2048負責人Kelvin話:「儲開客源就唔愁無生意,價錢大眾化就有穩定收入,唔使用劈價手法頂爛市,我哋又肯搞優惠送電話繩、理髮用品、鎖匙扣,回贈客人可以收宣傳效果,總之二樓舖有排做呀。」
empty
2048(23842048)旺角豉油街21號C1樓前座
empty
■靚仔Kelvin已經係生招牌。
empty
■旺角靚女多,店內女髮型師都好索。
四)劈場玩頂爛市
一個餅幾廿人分,旺角理髮店多到爆!唔少舖惟有以極低收費作招徠,業內人士稱之為「劈場」,儷舫棟出街嗰兩條價目Banner好誇張,「全日任做」(咁似馬檻宣傳語句嘅?)收$288、洗吹收$20,舖租6萬兼有大班員工,點經營呀?負責人林先生解畫:「薄利多銷囉,客路多數係比較成熟嘅人士(阿伯?)或學生哥,希望靠低價吸引客人,不過我哋唔算劈場,理髮用品一樣係Wella同黑人頭等大牌子。」有無額外收費?「護髮產品有唔同價錢,要視乎客人取向喇。」
儷舫(23819705)旺角洗衣街135號地下5號舖
empty
■另加服務費$8,即係屈貼士喇。
empty
■洗吹每次$20,咁多唔算劈場?
五)靠明星相搶客
為拉客,少啲噱頭都唔掂,天空之城就明Sell一站式服務加高科技裝修,店內貼滿明星相片,擺明靠明星作招徠。我本人就幾Buy呢間場,每個座位有LCD可以上網睇電視,啱晒怕悶嘅我,店主郭先生話:「我對自己嘅營運手法好有信心,仲諗住喺同區開多間豪裝百幾萬嘅分店,用高質素、低消費留客,只要服務夠好,客人自動會返轉頭。」貼明星相就梗㗎喇,阿Sa都捧場喎,阿SaFans仲唔捧場?

天空之城(27871130)旺角洗衣街175A地下
empty
六)派傳單
旺角條條街都有人派傳單,有時接傳單都接到你煩。理髮店都唔例外,仲會派靚女出動,務求派到你肯接為止,傳單有齊價目,希望客人清楚易明。
empty
七)掛大牌
基本上間間旺角二樓理髮店都掛超大廣告牌,慌死你睇唔到。
empty
empty
八)架步喺左近
無計,旺角係紅燈區,理髮店左近必有色情架步包炒,2048對上有四仔檔,HairDynamic隔籬係富盈華卡拉OK夜總會。
empty
九)必備電視
愈來愈多旺角髮理店有電視設備,中下價店多數用大陸牌子,用得起SONY嘅,級數就自不然分到出嚟嘞。
empty
十)店名老土
店名好老土,有人夠膽死照抄《風雲》字款做店名,有人改店名叫「傲」,得罪講句都幾老土。
empty