臨近香港回歸十周年，噚日主辦單位就喺銅鑼灣出動大班年輕人搞巡遊，除咗請到歌手古巨基同Twins，政界嘅何志平、林瑞麟同梁愛詩都有嚟撐場。喺巡遊隊伍當中，最爆笑就係有對拎住竹葉嘅熊貓，一高一矮後面仲有幾個青衣護駕，睇落非常騎呢。
直到下晝兩點幾，八方睇到港台網站嘅即時新聞有段「青少年慶回歸巡遊有十萬人參加」，咁大場面值得做A1新聞喎。點知睇完詳細內容先知係有「過萬人參加」，即係話港台寫錯字，變相報大數唱好慶回歸遊行。港台一向係「人民喉舌」報道真相，搞到俾人鬥「陰陽怪氣」兼前途未卜，查實得閒整多啲呢類「手民之誤」，話唔定有一線生機喎。