YouTube雙雄之一嘅陳士駿噚日來港宣傳港版YouTube，吸引大批傳媒採訪呢位網絡奇才。洋名Steve嘅陳士駿05年同拍檔「碌卡」創辦YouTube，其後被Google以16億美元天價收購，搖身一變成為億萬富豪，而佢今年只有29歲！
徐子淇飛上枝頭成為千億少奶傳奇恨死唔少港女，外界估計Steve最少有20億港元身家，雖然同李家誠差一截，但勝在白手興家，加上一身ITlook，衣着潮得嚟為人冇架子，絕對係一個超級筍盤。八方噚日膽粗粗問佢：「你有冇女朋友呀？」

唔知係Steve怕醜，定係八方太直接，Steve好似文革曾咁亁笑兩聲就想鬆人，八方為港女幸福，一於死纏難打追問，「唔通你已經結咗婚？」Steve終於含羞答答咁話，「我未結婚，不過已經有女朋友喇。」Steve透露女友係華裔，喺美國認識，至於係唔係台灣人就點都唔肯講，「總之係美籍華裔啦！」
雖然Steve名草有主，但佢一日未結婚，各位女士仍然有希望，八方畀啲貼士大家，Steve話佢最鍾意喺香港食海鮮，因為可以自己揀完再拎入廚房即劏即煮，各位姊妹下次去西貢、南丫島食海鮮時，話唔定Steve坐喺你隔籬枱，識做啦！