既然咁攰做乜仲要行山?盧教授話冇辦法,因為佢報咗名參加今年11月嘅樂施毅行者,要做足準備,但係日頭怕太熱,驚30幾度高溫下行到中暑,所以寧願捱眼瞓行夜山。今年樂施毅行者參加人數有成4,600人,破晒歷年紀錄,八方問佢咁勤力練習係咪想攞冠軍,佢聽完笑咗笑,話行得完成段路已經相當好。
今次盧寵茂同班同事完成同步換心肝手術,係香港醫學界一大突破,盧教授仲形容,今次手術可以話係佢醫學生涯之中難度最高嘅一次,唔係難在手術技巧,而係要心臟同肝臟外科、麻醉科、手術室護士等等,成70個醫護人員合作,大家要好好配合並唔容易。