劉太同陳育德同期加入政府,官場人士透露兩人私交不俗,又先後做過食物環境衞生署署長同影視處,有AO認為,陳育德並非好有觀眾緣星級官員,若非劉太做局長,而佢又同劉太有交情,相信未必有運行;更好彩係佢仲有兩年左右先退休,因為慣例一般唔會俾仲有年幾時間就咬糧嘅人升職,俾多啲機會後輩好過,因此陳育德今次認真行運,天時、地利、人和齊晒,旁人唔「恨」得咁多。
陳育德能否標尾會,要到揭盅之日先分曉,有官員指出,陳育德做食環署署長時,爆出孔雀石綠毒魚、蘇丹紅毒蛋流入香港事件,要公開道歉平息民憤,後來匆匆調任創作科技署,近幾個月比較少曝光,呢啲往績隨時令佢臨尾香,江湖傳聞現任港府駐美總經貿專員方舜文都係商務局常秘熱門,方舜文早兩個月先升正D6級,如果再升常秘,真係可喜可賀。
官場小道消息稱,其實大家預計旅遊事務專員區璟智會係下一個升職D8嘅高官,如果俾陳育德爬頭,都真係幾令人意外。
一般估計區璟智下一站係財經事務及庫務局,因為該局常秘何鑄明今年內夠鐘退休,區璟智以前做過財經事務及庫務局副秘書長,兜個圈升正做常秘合情合理。
mailto:
[email protected]