【勇士巡遊】印Tee寸騎士極速敗走 格連明挑大帝機
NBA勒邦占士勇士騎士總冠軍卡爾勝利巡遊祖蒙特格連
大人們口裏說要教小學生尊重對手,身體卻很誠實經常喺敗者面前攞彩,唔信你睇吓勇士前鋒祖蒙特格連(Draymond Green)就知!勇士日前喺NBA總決賽以場數4:1擊敗騎士,3年內第2度稱霸,周四就喺奧克蘭舉行勝利巡遊,吸引接近200萬球迷夾道歡迎。慶祝還慶祝,但格連擺明要踩多騎士一腳,身穿嗰件T裇大大個print寫住「Quickie」,個「Q」字仲係抄考騎士班主基拔(Dan Gilbet)公司Quicken Loans嘅logo,擺明諷刺騎士極速被淘汰咁話!「Quickie」點解?即係男性喺床上極速完事咁解…格連自詡呢個係佢嘅idea,交由教練主管Nick U'Ren負責執行,仲話件Tee由克利夫蘭生產!連一向予人謙謙君子印象嘅教練卡爾(Steve Kerr)都話:「有時我好厭倦做一啲懶謙虛嘅事,我都想似格連多啲。睇吓佢件T裇!我愛Draymond。」
呢邊廂騎士「大帝」勒邦占士(LeBron James)本來輕輕鬆鬆上載一段聽音樂做Gym片段上instagram,點知見到格連件Tee即刻火都嚟,cap圖兼留言:「呢句就係佢講嘅嘢,huh?」留意番,占士係用「she」稱呼格連,呢個出氣post旋即引來T湯臣(Tristan Thompson)、JR史密夫(JR Smith)等隊友,甚至其他隊球星好似韋斯卜克(Russell Westbrook)同夏登(James Harden)等畀like聲援。不過,正所謂成王敗寇,格連一於cap圖「追殺」:「Dubs終於令佢禿頭啦!恭喜老友占士。」睇嚟勇士同騎士呢對連續3季總決賽交鋒嘅冤家,仇口只會越燒越烈。