【亂噏24】圍繞新界丁權問題的《竊聽風雲3》下周四上映，扮演土豪的方中信和林家棟日前錄影《亂噏24》，分享拍攝點滴。席間，家棟被黎智英問為何還未成家立室，他表示自己現階段享受工作，兒女私情只能隨緣，又稱自己曾經歷情傷，只是沒有對外申訴而已。讀者可在 http://bit.ly/appletalk24 重溫今集《亂噏24》。
撰文：馮國康、Sidekick

承接首兩集，《竊聽風雲3》同樣是合拍片，用上幾位內地演員周迅、黃磊和黃奕。然而，他們的廣東話都頂呱呱，林家棟說：「因為中港合作機會多咗，就算我哋上到去講普通話都勉強應付到。」黎智英問他講普通話會否影響演出？家棟笑說：「打折啦！冇咗三、四成咁。」他解釋有時說一句對白，會想到廣東話文法，再將之拼湊成普通話，變相多了一重思考，因而影響演出。
方中信早年到內地拍戲，直至近年有了小朋友才減少北上，多留在港工作方便湊女。家棟說：「我好enjoy喎，因為乜都冇（家室）。」陳淑莊（Tanya）說：「係喎，你連緋聞都少喎！點查都冇。」家棟笑稱N年前也有緋聞：「佘詩曼囉（方中信已忍不住笑），係咪要笑㗎？應酬吓都要笑啦！」肥佬黎問家棟可有跟男性傳緋聞？家棟答得爽快：「有呀，劉德華囉！」肥佬黎說：「不過人哋話你都似喎，譬如你同阿媽咁接近，又冇緋聞，又冇女朋友……」家棟反駁：「我受情傷你唔知啫，都費事同你哋講，費事俾你哋追問。」

曾經諗過成家立室

家棟認為大家關心演員私生活無可厚非，報紙為刺激銷量亦需要八卦新聞，但他不覺得做演員一定要生活糜爛：「𠵱家演員好容易被label咗成日去玩去蒲，我覺得可以唔係咁。所以我唔係幾受記者歡迎，因為覺得你冇乜料到！」肥佬黎認為做演員已夠辛苦，假若夜晚還要劈酒應酬，會摧殘自己。他又稱最憎應酬：「Banker話出嚟食餐飯，我即刻將account轉去第二度。唔好搞我，𠵱家我坐枱呀？」
肥佬黎問家棟可有想過生小孩？他說：「暫時未諗過。」那可有想過成家立室？家棟答：「都曾經有諗過，𠵱家算罷啦！」他表示現階段享受工作，不太懂得分配時間：「有時你要喺工作中搵自己存在價值，你要我抽啲時間出嚟（拍拖），我又唔會shopping嘅，同你行PP（太古廣場），唔係啩！」肥佬黎續問他的存在價值是甚麼？家棟說：「𠵱家電影圈成日話青黃不接，我聽到呢啲說話會唔忿氣，我希望喺呢個圈有出過力。」

斥電影人不思進取

肥佬黎認為就算演員再努力，電影圈也難以擺脫青黃不接的困局，實情最需要是創意：「喺一潭死水入面，點樣創造一個生命出嚟，係需要好大嘅creativity。」造成創意流失，家棟歸咎於早年電影人太容易享受投機的成果，因為幾乎拍甚麼都成功，習慣形成後便無以為繼：「你睇東南亞電影、電視、音樂全部過晒你，點解？因為不思進取。」肥佬黎問：「會唔會因為香港最大嘅電視台壟斷咗，使創作人集中喺一個電視台，冇機會去犯錯或創新？」家棟雙眼發光：「以我理解，其實有好多創作嘅人喺入面。與其你話一台獨大，我就會話嗰個台做乜嘢？」
肥佬黎提到家棟早前離開劉德華自行發展，家棟聞言反應甚大：「冇合作啫，唔好講離開佢。你講到咁曖昧，我都唔知點答你！唔好諗住試探我。」他解釋兩人合作十幾年，是時候要轉變，最大原因是他覺得自己做幕後的慾望越來越大，現先做監製，最終希望做導演。肥佬黎問：「係咪驚住自己老，唔夠靚仔，所以做幕後呢？」家棟笑說：「從來唔質疑自己！你哋太隨波逐流啦，我有我嘅角度！」回復正經的家棟解釋，做演員始終是被動，像一隻棋子，只有做導演，才可以全盤掌握整件事。
肥佬黎探問方中信可有想過做導演，他以慵懶的聲線回答：「都有諗過，但我好懶！」肥佬黎即取笑他：「我諗你懶係真嘅，你連講話都懶！」方中信當然是說笑而已，若然當初沒努力，斷然沒有今天成就，只不過他覺得做導演、監製，芝麻綠豆的事情都要管，的而且確令他很累。

方中信為囡囡改變

51歲的方中信，身形依然弗到漏，不愧為「港版李察基爾」，原來他每星期健身五天，每次花上個半小時。肥佬黎問他可有變成另一個張家輝？他說：「其實講真唔難，四個禮拜內可以做到。只要有個營養師，教你食啲乜嘢，咁就好快做到。」方中信現時最大的樂趣就是湊女，他形容女兒的誕生「改寫他的一生」，他說：「改變得最緊要就係有家嘅感覺。」自從女兒出世後，方中信要幫她搵學校、又要幫她籌備課外活動，間接擴大了他的生活圈子：「個女鍾意騎馬仔，我話死嘞頴頭嘞，我平時係一個靜嘅人，唔識其他嘢，搞到要周圍問人，不過當中都有樂趣嘅。」
方中信最愛賽車，Tanya問他會否用多了時間湊女而減少了賽車時間？原來他00年在澳門參加完比賽後便停了，直至去年有朋友叫他才再上戰場，但感覺已大不如前：「𠵱家基本上係賽錢，要靚車、靚mechanic、又要帶有名嘅教練。」不過他愛賽車的原因，是因為可以鍛煉集中力，事關在半小時的比賽裏，他要全神貫注盯着軚盤、倒後鏡和側鏡，半點分神也不行。

大陸明星變香港人　學廣東話都快過人
http://bit.ly/talk244701

家棟受情傷　收收埋埋終於爆響
http://bit.ly/talk244702

明星私生活好吸引　夜蒲緋聞最引人
http://bit.ly/talk244703

錫阿媽要比嘢佢做　老人家都要生活態度
http://bit.ly/talk244704

家棟向導演進發　監製導演一腳踢
http://bit.ly/talk244705

方中Sir超級懶　唔做幕後唔駛煩
http://bit.ly/talk244706

明星食譜寡到喊　劉華淨係食魚蛋
http://bit.ly/talk244707

方中SIR浪子溶化　全因為有一個她！
http://bit.ly/talk244708

爸爸去哪兒？方中SIR︰我想去賽車
http://bit.ly/talk244709

電視少林寺出身　一年拍百幾集好甘
http://bit.ly/talk244710

家棟瞓身片場　隻手重傷手尾長
http://bit.ly/talk244711

方中SIR打架好狼死　攝影師嚇餐死
http://bit.ly/talk244712

阿女天真老竇好冧　家有細路全家開心
http://bit.ly/talk244713

愛事業定愛結婚　家棟對電影有使命感
http://bit.ly/talk244714

大台冇心　細台重溫　電影電視瀕死有原因
http://bit.ly/talk244715

【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk