馬主Ｎ從澳洲打電話嚟，話佢人在雪梨，周末要睇一場一級大賽，又碰啱佢隻馬在星期六出場跑泥地，叫左丁山代佢落沙圈督師，贏得出就代佢拉埋頭馬影相。係唔係呀，佢隻馬來港以後從無表現，得十六分啫喎，點贏？不過既然叫到，一於依時在沙圈出現可也。馬主Ｎ猛話澳洲紙太貴，貴過美元，搞到佢買馬找數時，鬼咁肉痛。澳洲可能係福地，東部南部有水災風災，西部有火災，但澳元就堅挺到極，升到你唔信，有澳洲紙收益嘅朋友，恭喜晒！支持仔女在澳洲讀緊書嘅朋友，好同情你地。
左丁山呢排賭運麻麻，買阿仙奴讓球客勝，見上半場已經入咗紐卡素四比○，當然心花怒放，點知下半場竟然踢成四比四，為之儍咗，嬲起上來立即下大啲注碼，買曼聯讓球客勝，然後上床瞓覺，點知第二朝起身一睇，今季無敵嘅榜首隊伍曼聯竟然輸咗畀包尾大幡降班膽狼隊一比二，點會唔心實吖。運氣如此，實在無話可說，新年到車公廟求籤，一支求橫財馬運，得到中籤，要義就係不宜希望太多。返到屋企翻查二十年來嘅車公籤，發覺自身、事業運有起有跌，上中下籤都求到過，唯獨是橫財呢方面，二十年來都係得到中籤，含義十分前後一貫，總係叫左丁山小心謹慎，不可賭博投機。好彩聽晒話，每次都係小注怡情，量力而為啫。