是我太過愛你、願意放生你...律政司尋日突然向前特首梁振英送上聖誕好消息，「話」因為證據不足，唔會就UGL案提出檢控，之所以用「話」，一如港大法律學院首席講師張達明所講，當局交代唔檢控決定嘅理據唔充份，又冇提及有冇向外尋求獨立法律界人士意見，所以好難判斷律政司決定係咪合理。相信對689嚟講，合唔合理都話知你，今日下午佢就有活動，唔知會唔會意氣風發講下係咪東山復出？

而喺689獲放生之際，林鄭都竟然切燒豬沖喜。吓？唔怕下屆爭連任又多返689呢個「勁敵」咩？林鄭喎，點會隨便為「外人」切燒豬吖！政界無人不知，林鄭依家最睇重嘅就係由馮程淑儀主理嘅政策創新與統籌辦事處，最新一份施政報告都由創新辦主理，可見角色幾咁重。而本來坐落喺灣仔舊警署嘅創新辦，原來已經投入添馬艦懷抱，同林鄭以後更親密。

設喺政總西翼26樓嘅創新辦尋日舉行簡單入伙儀式，林鄭親自到場主禮，仲送上金豬祝賀，大批局長都有到場賀林鄭嘅獨家班底新居入伙。佢喺facebook話創新辦係本屆政府新猷，大讚「佢地（哋）嘅辦公室都好創新，打破常規，少分隔房間，多共享空間，鼓勵同事更多互動交流」。