吊威吔大髀痛
周秀娜美人魚升胸誘哈林
周秀娜前晚到西貢,為「庾澄慶無底深愛巡迴演唱會」拍攝片段,Chrissie以美人魚造型示人,穿上金色比堅尼的她谷胸上陣,32D咪咪表露無遺。Chrissie更要穿上美人魚服飾,吊威吔離地20呎,同時又要做出於海中暢泳的動作,她表示之前都試過吊威吔,故此不太擔心。
Chrissie說:「以前睇啲關於美人魚嘅古仔都好浪漫,但我就發夢自己變咗條魚,同埋今日着呢件衫都幾辛苦,因為整到大髀好痛。」
在哈林下月的演唱會上,Chrissie將與哈林共舞,問是否表演辣身舞?她說:「我只可以講個古仔話我暗戀哈林,鍾意佢嘅程度仲要放棄埋條魚尾,當晚我會同今日嘅造型一樣咁靚,同埋跳接觸舞。」不過她表示在演唱會上不會獻醜開金口,雖然她有練習唱歌,但仍未有信心表演。
Chrissie說:「我知哈林係海豚音,但我嘅技巧都未到家,加上哈林唱歌咁勁,今次我都係負責聽佢唱歌,費事自己唱獻醜。」她又指從來沒有想過當歌手及出唱片。
對於崔建邦涉嫌毆打女友鄺敏慧一事,Chrissie表示遇到的男士都有紳士風度,男朋友對她更十分溫柔,當問到有否在分手時遭男友死纏?她笑說:「咁又冇呀,因為通常係我俾人飛,今次演唱會我就會死纏住哈林。」
此外,Chrissie昨日以噴血谷胸大露背現身灣仔電玩展,對於被Lavina暗寸騙fans錢,她說:「多謝佢哋嘅偉論,不如我送我首新歌《龍鱗》畀佢哋,我乜鱗都唔要,只係想要《龍鱗》,畀心機唱好自己啲歌。」
採訪:藍文浩
攝影:葉君海