衞蘭（Janice）噚日到香港電台接受訪問，當提到孖生妹妹衞詩（Jill），佢就眼紅紅同咬唇，仲話妹妹雖然聽唔到，但會一直支持同撐佢。Janice又話唔知Jill喺日本嘅最新消息，現時最幫到佢就係做好工作。佢仲話新英文歌《999》原本屬於Jill，但公司決定填上歌詞，由佢宣揚禁毒訊息。

新城照播《999》

至於早前網上出現疑似Janice訪問承認曾吸毒，Janice話：「我唔想解釋完俾人誤會，所以唔想提。」再問佢係咪唔會承認或否認聲帶係佢，佢表示：「係，我唔會答。」至於將來點幫妹妹戒除壞習慣，Janice就話：「妹妹已經知錯，做錯事要付出代價，就算公司解約都會支持，受懲罰唔代表唔原諒佢。」Amusic高級市場經理區小姐就話暫時未有Jill嘅新消息。
至於有幾個媒體包括無綫唔會播Janice新歌，區小姐話：「《999》係英文歌，我照send個MV畀無綫。」新城高層朱明銳噚日就話：「黎明同Janice嘅心意係想警惕後生仔唔好掂毒品，所以新城係支持嘅。佢犯過錯肯反省，大家應該接納佢。」一向無綫都唔會播唔係自己拍嘅MV，而無綫製作部總監（非戲劇製作）何麗全噚日話：「衞蘭嘅新歌如果有派台做挑戰歌，無綫會安排佢重新拍MV。」此外，環球高層黃劍濤話關楚耀（Kelvin）父母噚日會同Kelvin見面，佢幾時返港就未知。