沙田馬場啟用近40年，隨住賽馬發展同養馬量不斷攀升，舊有馬房設施唔夠用。馬會喺2008年奧運馬術比賽後，陸續將部份練馬師安排搬去奧運馬房，舒緩馬格逼爆問題。不過，幾個喺奧運馬房嘅練馬師，本星期四就出咗封聯署信畀傳媒，話希望同管理層見面，提出搬返去舊馬房嘅訴求。
聯署練馬師包括霍利時、鄭俊偉、胡森同孫達志，咁啱咁蹺，四位倉主其中三個今季都未贏夠馬達標，成績敬陪末席。霍利時叫做上咗岸，但都係僅僅夠數多啲。練馬師成績差，同用奧運馬房有冇關係，實情未必關事，但亦唔可以排除呢個可能性。
喺搬去奧運馬房前，馬會曾經應承幾位倉主，會起一條隧道貫通馬房同大圈，亦會起馬匹泳池等設施，方便練馬師安排馬匹操練。據聞工程進度未如理想，家陣泳池仲係起緊。相對用緊舊馬房嘅其他練馬師，喺奧運馬房嗰邊安排馬匹試跑游水，確係多咗不便同影響。
平心而論，幾位練馬師聯署要求搬返舊馬房範圍，絕對合情合理。再講，練馬師亦有責任向佢哋嘅馬房員工、支持佢哋嘅馬主同馬迷交代。
據聞馬會CEO老應知道練馬師發出聯署信後，已經即刻跟進有關訴求，叫有關部門約咗受影響嘅幾位練馬師，下個禮拜三見面，等佢哋直接反映奧運馬房嘅問題。凡事最緊要大家有溝通，有啲嘢練馬師唔講，馬會管理層又未必知。管理層同練馬師開心見誠講清楚有乜問題，一齊諗方法解決，咁就大家happy啦。

阿Joe