睇過淘大花園「沙士」報告，人人心驚，急忙仄清楚浴室兼廁所有冇U型聚水器。馬主H話唔識工程，乜都睇唔到，惟有打電話問惡佬明，惡佬明話：「我去過你屋企打牌幾次，觀察所得，應該有嘅，唔使驚。」係唔係有啲樓冇U型聚水器嘅呢？惡佬明話：「有㗎，照我所知，某座距離淘大不太遠，近住隧道嘅大廈就冇嘞，污水喉管直落，廁所內常有臭味，呢款排水管容易有污水倒流㗎！」

聽完都唔係咁安樂啫，馬主H即刻去買啲甚麼潔廁殺菌劑，放入水箱。做完工夫，門鐘響，大廈管理員送到上門，就係送兩嚿潔廁殺菌劑，呢間大廈業主委員會都算有心。馬主H搞完廁所，睇《南華早報》，見到大幅相就係山頂Mt.Kellett道七至九號，有大廈住客ChrisMarriott中招，但衞生署冇公布，唔知係唔係意圖遮掩，立即打電話搵美國R：「喂，你住在附近，有冇事？」美國R話：「嗱，證明SARS唔係歧視基層啦，𠵱家山頂豪宅都有。不過Chris啲同事話佢進出山頂明德醫院，話冇事，後來去瑪麗，又話冇事返屋企，之後就病發，傳聞話佢係喺瑪麗病房傳染到嘅喎。」Chris係FPDSavills嘅商業樓宇發展部負責人，年紀甚輕，希望佢染上「沙士」嘅消息唔好嚇怕外籍商人。美國R本來計劃去菲律賓宿霧（Cebu）或峇里島過復活節嘅，但兩地嘅老友都唔肯招呼佢，話明屋企人驚「你嚟」，美國R覺得無謂勉強，於是十幾年來第一次復活節留港消費。