韓國31歲主播兼主持人申雅英今日做新娘，將會與年輕兩歲嘅哈佛大學同學兼喺美國從事金融業嘅男友結婚。

根據韓媒指，申雅英同老公喺大學時認識，之後發展成戀人，其事務所表示因為男方唔係藝人關係，所以婚禮只邀請雙方家人及朋友，並以非公開形式進行。

而今日除咗申雅英結婚外，之前已宣佈今日結婚嘅仲有組合Monday Kiz出身嘅29歲林偉星以及喜劇演員出身嘅31歲女星成恩彩。當中林偉星今日亦喺首爾某處舉行婚禮，娶圈外老婆，林韓星上月喺網上發表結婚宣言，喺日前嘅綜藝節目《蒙面歌王》上，林偉星亦大冧準新娘，指會盡責任去愛佢，同時亦指準新娘係佢一生中優秀嘅伴侶。

至於成恩彩今日就同年長13歲嘅大陸中國企業家結婚，二人會先喺大陸舉行婚禮，下月6號再喺韓國舉行婚禮，而由於新郎哥係佛教徒，所以一對新人明年秋天亦會喺尼泊爾舉行婚禮。據報道指成恩彩嘅老公係來自湖南省，喺深圳從事房地產、建築等事業， 二人通過烏蘭巴托前市長嘅介紹，喺蒙古首次見面，之後發展成戀人。

更多韓流，喺晒《娛果》
http://fb.com/appledailyent