【如果識飛天】曾被彈唱功唔掂 鄭伊健明年2月開騷:我絕對有信心
鄭伊健羅文2019演唱會
「先天未必係最強,但我絕對有信心做到一個稱職嘅騷。」51歲鄭伊健有很多經典歌,《一個為你甘去蹈火海的人》、《動地驚天愛戀過》、《友情歲月》等,曾經被彈唱功唔掂的他,開過4次個人演唱會,近年跟陳小春、謝天華、林曉峰和錢嘉樂合作歲月友情巡唱更唱足3年,日子有功之下,伊健由被網民彈「唱歌似朗誦」變「唱得幾有feel」。
6年沒開個唱的伊健,明年2月回歸紅館舞台,日前伊健在香港仔接受《蘋果》專訪說:「你知紅館期好難攞,你想做都未必有得做,所以去到19年,由第一次開演唱會好緊張,得唔得㗎?到o依家好想將呢件事再做好啲,好似接收能量咁樣。」
今次個唱概念由電影角度出發,着重畫面上的美學。「之前試過整一棵樹喺舞台中間,嗰時大家唔係好接受,喺度鬧點解有棵樹遮住晒,其實想大家睇到唔同嘅舞台,o依家睇番大家覺得好靚。」至於演唱會海報用手遮面,都是從美學上出發,伊健說:「呢個都係朱祖兒構思,係人都知你個樣係點,不如用一個態度同感覺,只係見對眼,我覺得出嚟幾得意,我唔係一個新人,就算遮樣大家都知係我啦。」
伊健的長髮形象好煞食,但以前被人彈唱功唔掂,曾否對唱歌感到心灰意冷呢?他說:「無論形象又好包裝又好,出道都托賴有一定成績,咁我仲有時間,我可以改進,先天未必係最強,如果識飛天,就唔係我啦,咁我都有學習,到o依家都仲有學,我唔會停喺度,會接受新嘢,譬如有人話:『你跳舞唔使啦』、『佢跳得好好笑㗎』,到o依家我覺得唔係話最好,但我絕對可以handle到,絕對有信心做到一個稱職嘅騷。」
那些年又要拍戲又要錄歌,伊健坦言未能兼顧:「以前好驚,有段時間覺得對唔住自己,因為又要拍戲又要唱歌,今晚錄唔到隻歌就冇時間再錄,因為聽日飛咗去拍戲,但隻歌出街,大家會話:『嘩,咁嘅!』自己知其實唔係咁,但我冇得賴,出咗街就出咗街;以前真係好慘㗎,隻歌都未得,填詞又要等,唱片公司又催你,下次會醒目啲,唔好嘅嘢就唔出街,所以有啲歌我覺得未做到最好,但我會搬上演唱會再唱一次,隻歌可以再好啲。」
伊健的師傅是已故巨星羅文(羅記),除了教他唱歌,還教曉他做人態度:「如果1點訪問,羅記12點半已經坐喺度,呢個係態度,佢講嘅一樣嘢好啱,佢話好唔好唔緊要,慢慢學習,認真地對待自己,玩又好做嘢又好。佢從來冇鬧過我,大家覺得佢好惡,但佢教我時好從容,佢會話:『最緊要係最鍾意,如果嗰件事你係唔鍾意,你唔會做得好。』呢個態度我keep到o依家。」
場地:南海小館@海洋公園萬豪酒店
Hair : John Chung @ Barbieri Privata
Make up : WiLL Wong
精選娛聞,喺晒《娛果》
http://fb.com/appledailyent