一間公司可以喺三個月內賺到千四億港元,相信目前只有蘋果公司做到。而蘋果嘅千億賺錢秘技,點止iPhone咁簡單。
蘋果升呢全球企業賺錢王,背後嘅經營之道都幾old-school吓,就係靠高毛利率賣嘢食糊。公司上季毛利率有39.9%,相比同屬科技股嘅亞馬遜,兩間公司都係賣嘢,不過後者要蝕錢。蘋果銷售獨特之處就係好少減價酬賓,公司市場推廣掂之外,新增功能俘虜用家歡心。
蘋果公司喺二○○七年推出第一代iPhone起,iPhone價格企得穩陣,用家轉手炒賣都得。其他消費類電子產品唔好講話炒,一出機跌價都見唔少。上季蘋果賣走七千四百四十六萬部iPhone,所得收入五百一十一億美元,攤開計平均每部iPhone售價係六百八十七美元(並非六八九),創七年最高。而iPhone 6同iPhone 6Plus又幫公司淘出金礦,包括中、港、台嘅大中華地區,舊年收入按季增幅有三位數,達157%。更重要強國市場存在廣闊嘅空間。蘋果冇公佈大中華地區嘅iPhone銷售數字,但假設上一季中國賣走二千萬部iPhone,以全中國十三億人口計,都係每六十位強國人先得一人有iPhone,可見中國之大。當然蘋果做生意唔會將所有雞蛋放入同一個籃,今年四月登場嘅Apple Watch預計係吸金殺手鐧。
C+B
本欄逢周一刊出