【戰果速遞】首回合輸三粒 河床返主場爆seed入八球
阿根廷南美自由盃河床玻利維亞南美足球威斯特曼
今年嘅南美自由盃已經踢到去8強階段,阿根廷嘅河床首回合作客玻利維亞嘅威斯特曼雖然輸0:3,不過返到主場就變咗另一隊波咁款,喺次回合居然大炒對手反勝晉級,其中淨係計前鋒伊拿斯奧史高高一個人嘅入波,就已經夠數反勝!
面對住落後0:3嘅劣勢,以為河床得90分鐘好難追?實情係踢咗唔夠20分鐘,主隊已經追平。伊拿斯奧史高高喺9、14同埋19分鐘入波完成帽子戲法,加埋隊友安素佩雷斯喺36分鐘建功,河床半場已經領先4:0,兩回合計反先4:3。
伊拿斯奧史高高喺下半場一分鐘又入波,七分鐘之後連隊友恩拿斯奧費南迪斯都唔執輸整返粒。史高高喺58分鐘射入個人今場第五球,加上安素佩雷斯喺67分鐘嘅入波,河床最終大炒威斯特曼八隻光蛋,兩回合計贏8:3晉級。呢場波嘅波膽就夠晒誇張喇,不過足智彩嘅「主其他」賠率只係得11倍,真係世事都畀佢哋看透呀!