正所謂「相金先惠，格外留神」，上市公司搞得業績會，分析師到場出席，就緊係理所當然。不過，我諗今日成行，真係諗都冇諗過，竟然有一個業績會，你要行入佢門口，首先要放低幾嚿。

話說今日濰柴（2338）發全年業績，一早就Call齊記者同分析師，準時10點鐘開業績會啦。門口就有公關大員接待，放咗一袋二袋記念品。一切看似好正常，不過，神奇嘅事就喺呢一刻發生啦！只要分析師們埋位登記，佢就會聽到，「唔好意思，麻煩入場前，先買咗呢份記念品先啦。」吓？真係行過路過唔好錯過，呢份記念品，盛惠$388！生生發發，好意頭呀！如果分析師唔肯課金呢？Sorry，佢係冇得入去嘅，請回。

Well？即係咁，分析師係代表投資者去了解公司營業狀況，你竟然要人先畀入場費？係當自己擺緊酒要先畀人情嗎，「有請一對新人表演即場拆業績」；定係自己係迪士尼，「喺呢場業績會，你會展開一場奇妙嘅旅程，濰柴業績~is magic~」擺酒都話有餐飯食，咁呢盒價值388元正嘅記念品，到底係咩貨色？各位觀眾，388元濰柴禮物包有：尿袋一個，鋼筆一支、Sandisk手指一隻，同埋神秘禮物盒一個！

千萬唔好睇少支筆呀，支筆認真犀飛利，因為支鋼筆真係美國品牌Sheaffer犀飛利出品；至於個尿袋仲勁，印有「濰柴上市十五周年紀念」字樣，十五周年呀，真係可一不可再，下年你想佢再印同一個尿袋嗎？絕對無可能！更加突顯呢個尿袋矜貴之處，388蚊？抵到爛啦。

是咁的，據講今日有200分析師出席，屈指一算，一個業績會就有77,600蚊收入！呢啲咪識做生意！不過，又話說，濰柴對分析員一向都好唔客氣，董事長譚旭光上年8月，因為不忿大摩降濰柴目標價，喺業績電話會議度發老脾，鬧大摩分析員「你不是發佈賣出的報告了麼，你已經算好了呀，我覺着你看錯了，我要是老闆肯定炒了你。」鬧一個都唔夠，再鬧另一個，「你不也下調評級了，以後要多來問問我。」上次開你拖，今次就直接劏！認真出色！

到底濰柴係咪想利用呢份「濰柴上市十五周年紀念」禮品包趕客，想分析師打道回府呢？你睇吓記者嘅待遇就知了，待遇係點？每位出席記者，都獲派價值388元禮品包一份，歡迎隨便入內。

by千頌C@堆填區
http://fb.cm/winbigwok