內地官媒近期追住長和主席李嘉誠「撤資」窮追猛打，搞到誠哥都要親自發聲明話事件令人不寒而慄。全國政協常委唐英年都好有吉士，早前喺微博發文為呢位支持者抱不平，話有關評論「傷害了傳統中國人的一顆愛國心」；噚日則輪到香港潮屬社團總會出招，刊登廣告為誠哥呢位架己冷發聲。
香港潮屬社團總會噚日喺幾份報章刊登聲明，題為「港商支持國家發展的心志永不會變改」，主要針對早前內地官媒對李嘉誠嘅批評作出反駁，聲明話李嘉誠係首批進入內地嘅投資者，為國家經濟發展作出咗重要貢獻，批評內地個別人士嘅言論係「誇張失實的誣衊」。聲明強調李嘉誠投資海外業務，同國家政策無牴觸，「個別人士的批評顯然是無的放矢」，仲力撐李嘉誠係名副其實嘅愛國商人，喺內地辦學、建醫院，認為指摘李嘉誠「撤資」嘅文章對佢聲譽造成極大損害。

岳少劉鳴煒任會長

八方翻查資料，發現潮屬社團嘅首席會長猛人多多，包括旅發局主席林建岳、香港數碼廣播（DBC）大股東黃楚標同華置主席劉鳴煒等。其實個會出盡力撐李嘉誠，一來當然因為超人係潮州人，梗係要幫番鄉里；事實上超人亦係呢個總會嘅首席榮譽會長，踩李嘉誠咪等於踩個會？據聞會內唔少潮州怒漢都好㷫。
仲有，統戰部部長孫春蘭日前來港接見大孖沙及工商界時，李澤鉅都榜上有名，會後李澤鉅春風得意咁，唔少工商界私下都話，孫春蘭明顯有安撫李家，以示不代表中共官方立場，既然唔係中央正式落令，難怪潮屬社團可以高調為李嘉誠平反，撐吓呢位架己冷。

李八方
mailto:[email protected]