香港人近年相當鍾情泡菜文化，無論韓星定韓食，港人無任歡迎，但一場新沙士，揭露南韓政府隱瞞疫情，南韓人又對新疫症掉以輕心，似乎改寫咗港人好like韓風嘅情況。港大民意研究計劃噚日公佈嘅港人對各地政府及人民嘅好感調查發現，香港人對南韓人同埋南韓政府好感度插水，喺唔同年代俘虜港人芳心嘅全智賢同金鐘國，係咪要為國挽回港人支持？
港大民研調查結果所見，過去幾次調查中，港人對南韓人好感度至少都有五成，但新一次喺6月1至5日進行嘅調查中，好感度跌咗落去42%，而反感度則重上舊年5月時嘅8%。至於港人對南韓政府好感度更低，由過去38%至47%不等，插水至32%。

教授禁港生戴口罩上課

咁又難怪港人對韓人有啲不滿嘅。事關新沙士出現後，有南韓患者懷疑瞞住自己有病入境香港，南韓政府又唔重視疫情，甚至想隱瞞。最離譜係，竟然唔畀學生喺上堂時戴口罩。城大學生湯小姐日前接受無綫新聞訪問時話，2月底開始喺首爾嘅成均館大學交流3個月，最近因應新沙士同另一名香港學生戴口罩上堂，點知教授覺得佢哋咁樣唔啱，呼籲佢哋唔好「帶敏感的情緒和感受來我們的班和南韓」。佢哋拒絕除罩，結果被趕出課室，之後梗係向校方投訴。城大都關注事件，發言人話同成均館大學跟進後，對方已同意畀學生上堂戴口罩，而城大現有26名交流生喺南韓，部份人希望提早返港，包括呢兩位女生。

李八方
mailto:[email protected]