「有多少愛可以重來　有多少人願意等待
當懂得珍惜以後回來　卻不知那份愛　會不會還在」

現年56歲嘅台灣歌手黃仲崑，21年前呢首《有多少愛可以重來》唱到無人不識，但當中歌詞，其實黃仲崑本人明幾多？

歌就係咁唱，錯就繼續犯。黃仲崑今凌晨1點幾左右，駕車駛至仁愛路3段，被警方截查，驗出體內酒精含量值達0.88，今早即被大安分局以公共危險罪嫌，移送台北地檢署。

據《台灣蘋果日報》報道指，黃仲崑喺接受檢察官調查期間，酒仲未醒，一個問題要諗好耐先識答，仲喺度胡言亂語，供稱佢噚日同朋友喺屋企附近食完飯，飲完酒想返家，點知一上車就被警方截查。但係呢，之前黃仲崑同警方落口供，就話自己要去爬山，出門後先發覺唔記得帶手機，跟住又折返(凌晨去行山？)明顯前言不對後語。

檢察官認為黃仲崑根本未酒醒，講法變來變去，惟有等佢清醒番啲再查。及後警方表示黃仲崑態度良好，亦不住對酒後駕駛表達悔意。警方幫黃仲崑錄口供後，以公共危險罪嫌將佢移送法辦。及後黃仲崑離開台北地檢署，即被大批傳媒包圍，黃仲崑皺晒眉擠苦瓜臉，有記者問佢：「LuLu(黃仲崑的老婆)知道嗎？」，佢隨即面色一沉。離奇嘅係明明自稱要去爬山，原來踩住人字拖，真係唔知邊句真。至於黃仲崑架車，就由大安分局幫佢揸返屋企。

黃仲崑曾有一段婚姻，同前妻南西89年結婚，育有一子，後因聚少離多離婚；2000年認識LuLu，未幾黃仲崑捲入大麻案，LuLu仍堅定守候，兩人2007年結婚，並誕下一子。依家黃仲崑又闖禍，LuLu激到彈起:「我很生氣！這是不良示範！黃仲崑自己也很後悔，平時沒有固定喝酒的習慣，只有朋友聚會開心才會喝兩杯。他平時不可能酒駕還載老婆小孩，這件事情對大家很抱歉，黃仲崑的個性天真，他自己必須去面對這件事情。」