永安旅遊總經理陳淑芳話,呢個團真係抵到爛,三日兩夜包食包住包檢,都只係$13999,仲包兩晚五星酒店,比起本港私家醫院單係做個同類檢查,都承惠4萬銀。「體檢團」參加者將遠赴中國仁濟醫療旗下嘅上海PET-CT高端體檢中心,首尾兩日都係飲飲食食自由行,中間嗰日朝早就做檢查,到下晝就已經拎到份詳細檢查報告,不過係簡體字,繁體字同英文要等一個禮拜。
為咗加強聲勢,永安仲初步斟緊三哥苗僑偉、型男任達華等帶「明星體檢團」,主席余錦基就做榮譽領隊,就連永安代言人周汶錡都斟緊。「體檢團」將於8月17日起,逢星期五出發,唔知第一團嘅反應會係點呢?