老闆Ｂ返學校食飯，適逢范記游泳池舉行大學四角賽，於是落去泳池旁邊為師弟妹打氣，點知泳手捲起浪花，老闆Ｂ件西裝幾乎濕晒，一於當水為財可也，佢隻馬在星期日出賽，寫稿時當然不知勝負，如果真係贏咗，佢或者要多謝啲師弟整濕佢件衫。
返學校當然唔止一個，教授Ｗ拉埋十位八位校友到泳池，人人穿着整齊西裝，與師弟妹啲泳衣泳褲相映成趣；佢哋見到個大泳池，紛紛懷舊，CEOL回憶：「當年我入中大報名入學，喺范記飯堂填表，見到個泳池咁大咁靚，恨到流口水，心諗入咗中大，一定日日游水。結果？讀咗四年，游咗唔夠十次！」Ｌ總裁𠵱家更加唔得閒啦，往事只能追憶。

老秘Ｌ見到咁多校友喺度，乘機叫人捐錢：「嗱，泳池欠缺一塊電子板，大學想成立多啲體育獎學金，為學生體育活動打氣，你哋每位想捐幾多呀？」校友嘅心口係愛嚟打嘅，總之有錢出錢，有力出力啦，全世界嘅大學都係咁，好似UCLA、USC呢類名校，校友返去睇美式足球賽，想同校長坐埋一個廂房，有晒明碼實價㗎，USC贏咗兩年全國足球冠軍，校友捐款大增，可以講得係名利雙收，今年如果再贏，就會名留美國大學體育史，校友捐款會多到爆燈。可惜香港嘅大學體育引唔起公眾及傳媒興趣，大學捐款為體育，唔多容易。
因為地產Ｗ亦在場，老友Ｂ請地產Ｗ做經紀，代為賣樓，事關老友Ｂ係大業主，趁豪宅市場興旺，想話減持，獲利回吐，點知去唔到貨，佢好懷疑啲豪宅買家究竟人在何方，地產Ｗ一味話：「一於同你度到掂！」地產Ｗ肯唔肯捐錢呢？佢竟然話校長間屋如果重建，佢會考慮捐，理由係：「校長住宅應與大學聲威成正比，間屋係四十年樓咯喎！」校友聽咗大笑，以前校長住宅漏水，高錕在客廳擺膠桶載水，李國章入住後，話要裝修，俾學生抗議。裝修都咁艱難，點講到重建呀！