終於開始嘞，萬眾期待由金秀賢、孔孝真、IU同車太鉉主演嘅KBS新劇《製作人》(TheProducers)(前譯《Producer》)今日喺首爾記者會，韓國時間今日下晝2點，四位主要演員齊集現場，由於有男神金秀賢演出，所以現場擠滿過百來自亞洲各地嘅傳媒，好鬼墟冚。

佢哋四個輪住出場比記者影相，之前劇組公開嘅劇照中，金秀賢就以佢招牌嘅齊蔭頭現身，不過今日記者會佢就將頭髮gel起，不過都無損佢嘅靚仔樣，金秀賢出場時惹來哄動，佢先後同孔孝真及IU影合照，最後四位主角再企定定影大合照。

影完合照後，劇組就公開咗超長預告片，當中可以先睹為快了解金秀賢新劇係講乜嘢，而劇集將於本周五韓國時間晚上9時15分播出。